Lyrics: పుణ్యభూమి నాదేశం నమోనమామి - Punyabhumi nadesam song lyrics in telugu - Major Chandrakanth

punyabhumi nadesham song lyrics in telugu

పుణ్యభూమి నాదేశం నమో నమామి ధన్య భూమి నాదేశం సదా స్మరామి

పుణ్యభూమి నాదేశం నమో నమామి ధన్య భూమి నాదేశం సదా స్మరామి నన్ను కన్న నాదేశం నమో నమామి అన్నపూర్ణ నాదేశం సదా స్మరామి

మహామహుల కన్నతల్లి నాదేశం.. మహోజ్వలిత చరిత కన్న భాగ్యోదయ దేశం.. నాదేశం పుణ్యభూమి నాదేశం నమోనమామి ధన్య భూమి నాదేశం సదాస్మరామి

అదిగో... ఛత్రపతి ధ్వజమెత్తిన ప్రజాపతి మతోన్మాద శక్తులు చురకత్తులు జడిపిస్తే మానవతుల మాంగళ్యం మంట కలుపుతుంటే ఆఆ.. ఆఆ.. ఆఆ.. ఆ క్షుద్రరాజకీయానికి రుద్రనేత్రుడై లేచి మాతృభూమి నుదుటిపై నెత్తుటి తిలకం దిద్దిన మహావీరుడు సార్వభౌముడూ

అడుగో.. అరిభయంకరుడు కట్టబ్రహ్మన అది వీరపాండ్య వంశాంకుర సింహగర్జన అడుగో.. అరిభయంకరుడు కట్టబ్రహ్మన అది వీరపాండ్య వంశాంకుర సింహగర్జన

"ఒరేయ్ ఎందుకు కట్టాలిరా శిస్తు నారు పోశావా.. నీరు పెట్టావా.. కోత కోశావా.. కుప్ప నూర్చావా.. ఒరేయ్ తెల్లకుక్క! కష్టజీవుల ముష్టి నెత్తుకొని తిని బ్రతికే నీకు శిస్తేందుకు కట్టాలిరా"

అని పెళపెళ సంకెళ్లు తెంచి స్వరాజ్య పోరాటమెంచి ఉరికొయ్యల ఉగ్గుపాలు తాగాడూ కన్నభూమి ఒడిలోనే ఒరిగాడు

పుణ్యభూమి నాదేశం నమో నమామి ధన్య భూమి నాదేశం సదా స్మరామి నన్ను కన్న నాదేశం నమో నమామి అన్నపూర్ణ నాదేశం సదా స్మరామి

అదిగదిగో... అదిగదిగో... ఆకాశం భళ్ళున తెల్లారి వస్తున్నాడదిగో మన అగ్గిపిడుగు అల్లూరి.. అగ్గిపిడుగు అల్లూరి.

"ఎవడురా.. నా భరతజాతిని కప్పమడిగిన తుచ్ఛుడు ఎవడు ఎవడా పొగరు పట్టిన తెల్లదొరగాడెవ్వడు బ్రతుకు తెరువుకు దేశమొచ్చి బానిసలుగా మమ్మునెంచి పన్నులడిగె కొమ్ములొచ్చిన దమ్ములెవడికి వచ్చెరా.. బడుగుజీవులు భగ్గుమంటె ఉడకు నెత్తురు ఉప్పెనైతే ఆ చండ్ర నిప్పుల గండ్రగొడ్డలి పన్ను గడతది చూడరా"

అన్నా ఆ మన్నెం దొర అల్లూరిని చుట్టిముట్టి మందిమార్బలమెట్టి.. మరఫిరంగులెక్కుపెట్టి ఆఆ.. వందగుళ్ళు ఒక్కసారి పేల్చితే.. వందేమాతరం.. వందేమాతరం వందేమాతరం.. వందేమాతరం వందేమాతరం అన్నది ఆ ఆకాశం

అజాదు హిందు ఫౌజు దళపతి.. నేతాజీ అఖండ భరతజాతి కన్న మరో శివాజీ

సాయుధ సంగ్రామమే న్యాయమని స్వతంత్య్ర భారతావని మన స్వర్గమని ప్రతి మనిషొక సైనికుడై ప్రాణార్పణ చెయ్యాలని హిందు ఫౌజు జైహిందని నడిపాడు.. గగన శిగలకెగసి కనుమరుగైపోయాడు

జోహార్ జోహార్.. సుభాష్ చంద్రబోస్ జోహార్ జోహార్.. సుభాష్ చంద్రబోస్

గాంధీజీ కలలుగన్న స్వరాజ్యం సాధించే సమరంలో అమరజ్యోతిలై వెలిగే ధ్రువతారల కన్నది ఈ దేశం చరితార్థుల కన్నది నా భారతదేశం.. నా దేశం

పుణ్యభూమి నాదేశం నమోనమామి ధన్యభూమి నాదేశం సదాస్మరామి నన్ను కన్న నా దేశం నమోనమామి అన్నపూర్ణ నాదేశం సదాస్మరామి

వీక్షించండి: